Khilaafka Sahanka Shidaalka Oo Badalay Murankii Warshadda Shamiitadda Iyo Madax Dhaqmeed Digniin Hor Leh Soo Tabiyay
“Waxaanu taaganahay Dhagaxa Meel laga qaado wixii aanu ku
bedelan lahayn ayaanu ka rabnaa"
Caynaba, Somaliland, April 06, 2013,
(Saxafi) - Muranka xoogan, ayaa ka taagan Mashruuc Sahamin shidaal ah oo laga
bilaabayo Deegaanada Gobolka Saraar. kaasoo Bulshada deegaanku ka soo
horjeesatay.
Mashruucan oo ay bilaabayso Shirkad
Magaceeda la yidhaahdo GENEL ENERGY, ayaa lagu wadaa in qoditaankiisu bilaamo
Bilaha soo socda, hase ahaatee qaylo dhaan xoogan oo lagu diidanyahay habka loo
maamulayo Munaafacaadka Bulshadu ka dheefayso inta uu socdo mashruucaasi, ayaa
ka soo yeedhaysa Odayaasha Dhaqanka, Waxgaradka, Aqoonyahanka iyo qaybaha Bulshada
ee Gobolka Seraar, kuwaasoo ka cabanaya inaan haba yaraatee wax saami ah laga
siin Shaqaalaha loo qaatay, isla markaana aan Bulshada Xoolo dhaqatada ah ee
Dhulkooda la qodayo aan wax taageero ah loo fidin.
Qaylo-dhaanta ka soo yeedhaysa
Odayaasha Deegaanka, ayaa muujinaysa in xaalad nabad-gelyo daro halkaasi ka soo
fool leedahay, hadii aanay dawlada Somaliland xal u raadin, taasoo ay xubno ka
mid ah Madaxda dhaqanka iyo Siyaasiyiinta Gobolka Saraar Digniin cad ka soo
saareen, ka dib markii ay shir-jaraa'id ku qabteen Magaalada Caynabo ee xarunta
Gobolka Saraar.
Caaqil Maxamed Daroor Ducaale, ayaa
ka hadlay muranka ka taagan qorista Shaqaalaha Mashruucaasi ka hawl-gelaya iyo
cabashada deegaanka ka soo yeedhaysa, waxaanu yidhi "Shirkadda Shidaalka
ka baadhaysa Saddexda Gobol ee Togdheer, Saraar iyo Sanaag oo aanu saddexdaba
wax ka degno, shirkadaasi waxay halkaa ka wadaa waa Khal-khal nabad-gelyo ,
waxay yidhaahdeen maamulka Shirkaddu dadweynaha la hadli mayno annaguna waxaanu
nahaya madaxdii dhaqanka ee Gobolka"ayuu yidhi. waxaanu intaasi raaciyay
"markaa hadii aanu nahay Waxgaradkii Gobolka sida qawaaniinta Caalamka ee
qodista Macdanta iyo Shidaalku dhigayaan, marka sidan oo kale meel wax looga
qodayo dadka dhulkaasi degen wixii ay xaqa u lahaayeen, haday mashaariic biyood
tahay, haday kuwo waxbarasho tahay iyo haday kuwo kaleba tahay waanu ka
doonaynaa ilaa konton tuulo ayuu Gobolku ka koobanyahaye"ayuu yidhi.
isagoo hadalkiisa sii wata
caaqilku waxa kale oo uu cadeeyay "Qandaraadyadiibaa yimi, Qandaraasyadii
Shirkaddu bixisay Beel kaliya ayaa la siiyay, Caynaba waanu kula hadalnay Ninka
shirkada Maamulaya oo waanu u cabanay, dee laydinba baahna ayuu nagu yidhi,
taasina waxaanu ka leenahay Madaxweyne iyo Golayaasha kale ee Qaranka waxaanu
doonaynaa waxaanu xaqa u lahayn ee Dastuurku noo jideeyay, hadii la diidana
taasi waxay keenaysaa inay isku dhacaan Shirkadda iyo Bulshada deegaanku,
markaa madaxweyne arintan inaad soo faro-geliso ayaanu doonaynaa"ayuu
yidhi. "waxaanu doonaynaa in Dhulkaa Maanta Shirkadda shidaalka qodaysaa
Xogogaal loo noqdo oo ay xukuumaddu xogogaal u noqoto hadii dadweynaha degeni
Dulmi tirsado in hoos loo eego ayaanu doonaynaa in la fududeysto hadalka naga
soo baxayna waanu doonaynaa, waayo Bulshada deegaanku waa dad Hayin ah oo aan Quudhsiga
aqoon"sidaasi waxa yidhi Caaqil Maxamed Xasan Biide oo ka mid ah
Nabad-doonada Gobolka seraar.
Caaqil Jaamac Faarax oo isaguna arintan
ka hadlay ayaa yidhi "waxaa jiray todobaatan sanadood, intaaba waxaan
degenaa halkaa shirkadda maalintii dhaweyd loo Calaamadiyay oo aan ku dhashay,
markaa waxaanu doonaynaa waxaanu xaqa u lahayn, hadii la waayo waxaanu xaqa u
lahayn ee Bulshada aanu dhaqanka u nahay waayaan waxay leeyihiin, annagu
nabad-gelyada masuul kama nihin hadaanu nahay Cuqaashii gobolka, kamana noqon
doono"ayuu yidhi.
waxaanu intaasi ku daray "hadii
ay ogolaadaan waxaanu xaqa u leenahay, waxaanu doonaynaa inaanu heshiis la
galno boqolkiiba inta aanu ku leenahay Shaqaalaha meesha ka
shaqaynaya"ayuu yidhi.
Xasan Suldaan Cabdi Suldaan
Cali ayaa isaguna shirkan Jaraa'id ka hadlay, waxaanu yidhi "
Madaxweyne waxaanu kugu dooranay waxaad tidhi Cadaalad iyo horumar ayaan wax
idiinku qabanayaa, horumarkii waanu aragnaa oo ma xuma, laakiinse Cadaaladii
waanu dhaliilaynaa oo hadii ay Cadaaladi jirto dee halkaaba kamaanu hadalneen
maanta, markaa waxaanu ku leenahay adigaa wadanka ka madaxweyne ah ee hadii
bulshada gobolku khaldanto iyo haday Shirkadu khaldantahay adigaa madaxweyne ah
ee kala saar"ayuu yidhi.
waxaanu Xasan Suldaan Cabdilaahi
intaasi ku daray "Qandaraasyada annagaa leh, Shaqaalaha anagaa leh, waxa
kale oo shirkadda looga baahanyahay inay Kontonka Tuule ee Gobolka Saraar, ay
keento waxay kaga iibsanayso Dhulkooda ay Shidaalka ka baadhanayso ee ay
Cagafta iyo Gawaadhida marinayso" - " mudane madaxweyne hadii aanu is
qabano annaga iyo shirkadaasi adigaa na kala qaban kara, waxaanu doonaynaa
inaad noo timaado oo aad na kala qabato, hadii la waayo waxaanu leenahay
waxaanu kuu sheegaynaa Madaxweyne inaanaan waxba ogolaan doonin, wax ka
soconayaana ma jiraan arintaasi ee Ogow"ayuu yidhi.
Ugu dambeyn waxa halkaasi ka hadlay
Badhasaabkii hore ee Gobolka Saraar Saleban Xaaji Ducaale, kaasoo sheegay in
Shaqaalaha shirkadda shidaalka baadhaysa la siiyay Beel kaliya sida uu hadalka
u dhigay, waxaanu yidhi "Beel kaliya iyo in isku dhinac ah ayaa qaatay
Shaqaalaha oo maamulaysa wixii umaddu xaqa u lahayd taa ma ogolin ee umadda si
cadaalad ah wax haloogu qabto oo haloo siiyo. hadii wadanka shirkadi timi oo
wax ka qabsanayso wixii munaafacaad ah ee laga helayo dadka deegaanka wax laga
fulinayo ayaa xaq u leh"ayuu yidhi.
Dhinaca kale, Mahad Maxamed Cawaale
oo sheegay inuu Afhayeenka Bulshada gobolka yahay ayaa sheegay in Maamulka
Shirkadda Shidaalka qodaysaa hore u balanqaaday inuu bulshada deegaanka
wax u qabanayo, hadana uu markii dambe ka war-wareegay wixii uu balan qaaday
"Maareeyaha Shirkadda shidaalka qodaysaa hore wuxuu u balan qaaday inuu
lacag ilaa saddex Milyan ah oo mashaariic horumarineed lagu qabanayo bixinayo,
waxaanu lacagtaasi ka balan qaaday shir aanu ku wada galnay wasaaradda Macdanta
iyo Biyaha oo ay goob joog ka ahaayeen Wasiirka Macdanta iyo Biyaha, Wasiirka
Ciyaaraha iyo Xildhibaano gobolka laga soo doortay"ayuu yidhi.
waxaanu intaasi raaciyay
"Lacagtaasoo qadarkeedu dhamaa ilaa saddex Milyan oo Dollar ($ 3000,000 ),
hadana aanu xogta ku helnay inuu sheegayo Lix Milyan, wuxuu ka bixiyay ma
jirto, shaqaalihii la qaatayna waa laga qadiyay dadka Gobolka, waxaanan xaq u
lahayn 75%, markaa annagu waxaanu taaganahay Dhagaxa Meel laga qaado wixii aanu
ku bedelan lahayn ayaanu ka rabnaa"ayuu yidhi.
Ma jiro war ka soo baxay Shirkadda
GENEL ENERGY oo la xidhiidha cabashadan ka soo yeedhaysa Bulshada Gobolka
Saraar, noomanay suurto gelin inaanu helno Maamulka shirkadaasi si aanu wax uga
weydiino eedeymaha loo soo jeedinayo, hase ahaatee xukuumadda Somaliland ayaa
sanadkii hore dabayaaqadiisii shirkadda GENEL ENERGY ruqsad baadhis shidaal ah
siisay, taasoo qayb ka ah Shirkado dhawr ah oo sanadkii hore Maal-gelin shidaal
inay dalka ka fulinayaan la sheegay.
Comments
Post a Comment